पोलिस प्रवाह न्युज
माणगाव – दि. ११- माणगाव तालुक्यातील निजामपूर विभागातील मौजे येरद येथे जबरी चोरीत महिलेचा मृत्यू झाल्याची घटना घडली आहे.
पोलिस सूत्रांकडून मिळालेल्या माहितीनुसार सविस्तर वृत्त असे की, दि. १० मे रोजी सकाळी ७.४५ वा. ते ११.४५ च्या दरम्यान कोणीतरी अज्ञात इसमाने फिर्यादी मनोहर मोकाशी, रा. येरद यांच्या घरामध्ये जबरी चोरीच्या उद्देशाने प्रवेश करून फिर्यादी यांच्या पत्नी संगीता मनोहर मोकाशी, वय ७० वर्ष हिस जबर मारहाण करून तिच्या गळ्यातील, कानातील, हातातील असे एकूण ३८४०० रुपये किमतीचे दागिने चोरून महिलेला जबर दुखापत केली. या दुखापतीत संगीता मोकाशी यांचा मृत्यू झाला आहे.
या घटनेची माहिती मिळताच अप्पर पोलिस अधीक्षक रायगड अभिजित शिवथरे, उपविभागीय पोलीस अधिकारी शंकर काळे, स्थानिक गुन्हे अन्वेषण शाखा रायगड बाळसाहेब खाडे, पो. नि. माणगाव निवृत्ती बोऱ्हाडे, स. पो. नि. नरेंद्र बेलदार, पोलिस उपनिरीक्षक विकास चव्हाण यांच्या सहित श्वान पथक, अंगुलीमुद्रा, फॉरेन्सिक टीमने घटनास्थळी भेट दिली. या घटनेची नोंद माणगाव पोलिस ठाण्यात करण्यात आली असून पुढील तपास पो. नि. निवृत्ती बोऱ्हाडे करीत आहेत.
