पोलीस प्रवाह न्युज
माणगाव, दि. १३- राज्यातील सोळा वर्षात शासनाला पूर्ण न करता आलेल्या बहुचर्चित मुंबई-गोवा या राष्ट्रीय महामार्गावर अपघाताचे प्रमाण हे दिवसेंदिवस वाढत आहे. मुंबई गोवा महामार्गावर माणगाव तालुक्यातील मौजे लाखपाले येथे आणखी एक भीषण अपघात घडला आहे. या अपघातात एक महिला वैद्यकीय अधिकाऱ्याला आपला जीव गमवावा लागला आहे.
या अपघातात डॉ. प्रियंका भास्कर आहेर (वय – ३२ रा. बीड सध्या रा. पुणे) यांचा अपघातात जागीच मृत्यू झाला आहे. तर त्यांच्यासोबत असणारे डॉ. विशाल रमेश बडे (वय – ३० रा. अनपटवाडी पारगाव तालुका पाटोदा जिल्हा बीड ,सध्या रा. पुणे) हे जखमी झाले आहेत. या अपघाताची माहिती गोरेगाव पोलिस ठाण्यात समीर अब्दुलवहाब मुरुडकर यांनी दिली आहे.
याबाबत सविस्तर माहिती अशी की, दिनांक १२ ऑगस्ट रोजी सायंकाळी ५.३० वाजता राहुल रामचंद्र यादव (वय २४) हा आपल्या ताब्यातील मालवाहतूक करणारा कंटेनर घेऊन रायगड जिल्ह्यातील महाड येथून मुंबईच्या दिशेने निघाला होता. मुंबई गोवा राष्ट्रीय महामार्गावर असणारा रस्ता हा चढावाचा आहे, हे माहित असताना देखील कंटेनर चालक राहुल यादव हा कंटेनर एका लेनवरुन दुसऱ्या लेनवर वेडी वाकडीकरुन चालविवत होता. यावेळी माणगाव तालुक्यातील गोरेगाव पोलिस स्टेशन हद्दीत असणाऱ्या मौजे लाखपाले गाव येथील निर्मल एच. पी. पेट्रोलपंप समोर या कंटेनर आणि कारचा भीषण अपघात झाला.
डॉ. प्रियंका भास्कर आहेर आणि डॉ. विशाल रमेश बडे हे मुंबई-गोवा राष्ट्रीय महामार्गावरुन पुण्याला जात होते. त्यांच्या कारने कंटेनरला मागून जोरदार धडक दिली. ही धडक इतकी जबर होती की कारचा समोरचा भाग पूर्णपणे कंटेनरच्या पाठीमागील चॅशीच्या खाली जाऊन फसला. या अपघातात डॉ. प्रियंका भास्कर आहेर यांच्या डोक्याला गंभीर दुखापत झाल्याने आणि मोठ्या प्रमाणावर रक्तस्त्राव झाल्याने त्यांचा जागीच मृत्यू झाला. तर त्यांच्या समवेत असणारे चालक वैद्यकीय अधिकारी डॉ. विशाल रमेश बडे यांना गंभीर स्वरुपाच्या दुखापती झाल्या आहेत.
या अपघाताची माहिती गोरेगाव पोलीस ठाण्याचे प्रभारी सहाय्यक पोलीस निरीक्षक विजय सुर्वे यांना मिळताच त्यांनी आपल्या कर्मचारी यांच्यासह घटनास्थळी धाव घेतली. घटनास्थळी असलेल्या नागरिकांच्या मदतीने मृत डॉ. प्रियंका भास्कर आहेर आणि जखमी डॉ. विशाल रमेश बडे यांना यांना रुग्णालयात हलविण्यास मदत केली. याबाबत गोरेगाव पोलिस ठाण्यात अपघाताची नोंद करण्यात आली असून अधिक तपास सहाय्यक पोलीस निरीक्षक विजय सुर्वे यांच्या मार्गदर्शनाखाली पोलिस उप निरीक्षक एस. एन. रासकर करीत आहेत.
